काभ्रे। जिल्लाको बनेपा बजारमा नेपाली कांग्रेसका नेता तथा प्रदेशसभा सदस्य उम्मेदवार गणेश लामाको रिहाइको माग गर्दै प्रदर्शन भएको छ ।

आज दिउँसो नेपाली कांग्रेस काभ्रे र भातृ संगठन नेपाल विद्यार्थी संघ तथा तरुण दलले विरोध प्रदर्शन गरेका हुन् ।

कांग्रेस काभ्रेका नेता तथा पूर्वराज्यमन्त्री कञ्चनचन्द्र वादेका अनुसार लामालाई पोखराबाट प्रतिशोधपूर्वक पक्राउ गरेको भन्दै विरोध प्रदर्शन गरिएको हो । ‘कांग्रेस काभ्रेका युवा नेतालाई विनाकारण प्रहरीले पक्राउ गरेको छ । उहाँलाई तुरुन्त निसर्त ससम्मान रिहाइ गर्नुपर्छ ’ पूर्वराज्यमन्त्री वादेले भने, ‘सरकारले यस्तो हर्कत गर्दै जाने र लामालाई रिहाइ नगरे हामी कोभिड–१९ को प्रवाह नगरी कडा प्रतिवादमा सडकमा उत्रनेछौँ ।’

उनीहरुले बनेपाको दोबाटो, चारदोबाटोमा कांग्रेस कार्यकर्ताहरू प्लेकार्डसहित प्रदर्शनमा सहभागी भएका थिए ।