काठमाडौं । हङकङकी आरोही साङ यी हङले २५ घण्टा ५० मिनेटमामा सगरमाथाको सफल आरोहण गरेर सबैभन्दा छिटो आरोहण गर्ने महिला आरोहीको कीर्तिमान राखेकी छिन् ।

शनिबार दिउँसो १ बजेर २० मिनेटमा सगरमाथाको आधार शिविरबाट उकालो लागेकी उनी आइतबार दिउँसो ३ बजेर १० मिनेटमा सगरमाथाको चुचुरो पुगेकी हुन् ।

सम्पर्क अधिकृत ज्ञानेन्द्र श्रेष्ठका अनुसार हङले २५ घण्टा ५० मिनेटमा चुचुरो चुम्न सफल भएकी हुन् ।

यसअघि नेपालकी आरोही फुन्जो झ्याङ्मु लामाको नाममा छिटो आरोहणको कीर्तिमान रहेको थियो । उनले १५ मे २०१८ मा ३९ घण्टा ६ मिनेटमा सगरमाथा चढेर छिटो चढ्ने कीर्तिमान राखेकी थिइन् ।

पुरुषतर्फको कीर्तिमान भने पेम्बा दोर्जे शेर्पाको नाममा छ । उनले सन् २००४ मा राखेको ८ घण्टा १० मिनेटमा सगरमाथाको सफल आरोहण गरेका छन् ।