काठमाडौं । नेपाल कम्युनिष्ट पार्टी (नेकपा) एमालेका उमेद्वार एवं गृहमन्त्री रामबहादुर थापा बादल राष्ट्रियसभाको उपनिर्वाचनमा पराजित भएका हुन्। बादलले पार्टीकै माधव नेपाल पक्षका मत तान्न नसकेपछि विजय असम्भव बनेको हो ।

बादललाई हराउँदै राष्ट्रियसभा सदस्यमा डा. खिमलाल देवकोटा विजयी भएका हुन्। देवकोटाले ५०८८ मतभार पाए भने प्रतिद्वन्दी बादलले ४०१४ मतभार पाए । त्यस्तै नेपाल मजदूर किसान पार्टीका कृष्णबहादुर तामाङले १३२ मतभार प्राप्त गरेको निर्वाचन कार्यालयले जनाएको छ ।

देवकोटालाई विपक्षी गठबन्धन (नेपाली कांग्रेस, नेकपा माओवादी केन्द्र, जनता समाजवादी पार्टी र नेकपा एमालेको माधवकुमार नेपाल समूह)को समर्थन रहेको थियो ।

आजै दिउँसो सरोच्च अदालतले पनि गृहमन्त्री बादललगायत ७ जना मन्त्रीहरुको नियुक्ति बदर गरेको थियो। आजको दुवै नतिजाले गर्दा गृहमन्त्री बादलमाथि बादल लागे जस्तै भएको छ।