काठमाडौं । जनता समाजवादी पार्टी (जसपा) का अध्यक्ष महन्थ ठाकुर र वरिष्ठ नेता राजेन्द्र महतोले राष्ट्रपति विद्यादेवी भण्डारीलाई भेटेका छन् ।

सोमबार प्रधानमन्त्री केपी शर्मा ओली विश्वासको मतमा अल्पमतमा परेपछि राष्ट्रपति भण्डारीले बहुमतको सरकार गठन गर्न दिएको समय घर्किन लागेका बेला उनीहरूले शीतल निवास गएर राष्ट्रपति भण्डारीलाई भेटेका हुन् ।

भेटमा अध्यक्ष ठाकुर र नेता महतोले जसपाको प्रथम अध्यक्ष आफू भएको र निर्वाचन आयोगमा पनि आफ्नै हस्ताक्षर चल्ने भन्दै अरु कोही आए वैधता नदिन राष्ट्रपति भण्डारी समक्ष आग्रह गरेको स्रोतले बताएको छ।

शीतल निवास जानुअघि ठाकुर र महतोले बालुवाटारमा गएर प्रधानमन्त्री ओलीसँग छलफल गरेका थिए । छलफलमा विपक्षी गठबन्धनलाई बहुमत पुग्न नदिने रणनीतिबारे छलफल भएको स्रोतको भनाइ छ।

जसपाका अर्का अध्यक्ष उपेन्द्र यादव-बाबुराम पक्ष विपक्षी गठबन्धलाई सहयोग गर्नुपर्ने अडानमा छ भने ठाकुर र महतो भने ओलीलाई नै निरन्तरतामा देखिएका छन्। जसले गर्दा सोमबार उनीहरुले तटस्थमा बस्दै मतदानको क्रममा भोट हालेका थिएनन्।