काठमाडौं । काठमाडौं उपत्यकामा जारी रहेको निषेधाज्ञा १५ दिन थप गरिएको छ ।

आज बसेको काठमाडौं उपत्यकाका तीनवटै जिल्लाका प्रमुख जिल्ला अधिकारी (सीडीओ)को बैठकले निषेधाज्ञा जेठ १३ गतेसम्म थप गर्ने निर्णय गरेको हो ।

त्यस्तै आजको बैठकले राष्ट्रिय प्राथमिकताप्राप्त विकास आयोजनाबाहेकका सबै निर्माण कार्य पनि रोक्ने निर्णय गरेको काठमाडौँका सीडीओ कालीप्रसाद पराजुलीले जानकारी दिए।

पराजुलीका अनुसार बैठकले अबदेखि पार्टी प्यालेसमा विवाह, ब्रतबन्ध र भोजजस्ता कार्यक्रम पनि रोक्ने र यस्ता कार्यक्रम घरमा गर्दा पनि १० जना भन्दा बढी सहभागी हुन नपाइने निर्णय गरेको छ।

त्यस्तै,उपत्यकामा विहान १० बजेसम्म किराना पसल र डिपार्टमेन्ट स्टोर खोल्न दिने निर्णय भएको छ । ९ बजेसम्म मात्र खोल्न दिँदा भीडभाड बढेको हुनाले १० बजेसम्म खोल्न दिने निर्णय गरेको उनको भनाइ छ ।

यसअघि सरकारले गत वैशाख १६ गतेदेखि कोरोना भाइरस संक्रमणको चेन ब्रेक गर्न भन्दै काठमाडौँ उपत्यकाका जिल्लालगायत अन्य बाहिरी जिल्लाहरुमा समेत निषेधाज्ञा जारी गरिएको थियो।