काठमाडौं। सर्वोच्च अदालतले प्रधानमन्त्री केपी शर्मा ओली र भारतीय गुप्तचर संस्था (रअ) प्रमुख सामन्तकुमार गोयलबीच सम्झौता भएको भन्दै नक्कली (फेक) समाचार छापेको उज्यालो नेटवर्क अनलाइनका सम्पादकलाई थुनामुक्त गर्न आदेश दिएको छ।

आज सर्वोच्चले उक्त अनलाइनका कार्यकारी सम्पादक तामाङ र महाप्रबन्धक लामालाई थुनामुक्त गर्न आदेश दिएको हो ।

न्यायाधीशहरु ईश्वरप्रसाद खतिवडा र डा. आनन्दमोहन भट्टराईको इजलासले बन्दीप्रत्यक्षीकरणको आदेश जारी गरेको हो । उनीहरूलाई तारेखमा राखेर पनि अनुसन्धान गर्न गर्न सकिने भन्दै थुनामुक्त गर्न आदेश जारी गरिएको बताइएको छ।

प्रधानमन्त्री ओली र भारतीय गुप्तचर संस्था रअ प्रमुख गोयलबीच सम्झौता भएको भन्दै समाचार छापेर पुष्टि नभएपछि उक्त अनलाइनले क्षमासमेत मागेको थियो।

यसअघि गत बैशाख १२ गते प्रधानमन्त्री ओली र रअका प्रमुख गोयलबीच ४ बुंदे सहमति भएको नक्कली (फेक) पत्रसहित समाचार प्रकाशित गरेको भन्दै उज्यालो नेटवर्क डटकमका कार्यकारी सम्पादक तामङ र महाप्रबन्धक लामालाई प्रहरीले कार्यकक्षबाटै पक्राउ गरेको थियो।

तर, त्यतिबेला प्रहरीले तामाङ र लामालाई विद्युतीय कारोबार ऐन र राज्यविरूद्ध कसुरसम्बन्धी मुद्दामा पक्राउ गरेको बताएको थियो।