सप्तरी । सरकारी निर्णय अवज्ञा गरी विद्यालय सञ्चालन गर्ने सप्तरीका ११ निजी विद्यालयका सञ्चालकलाई प्रहरीले पक्राउ गरेको छ ।

कोरोना संक्रमण फैलिन लाग्दा सरकारले सदरमुकाम राजविराजका विद्यालयहरु वैशाख मसान्तभरका लागि बन्द गर्न निर्देशन दिएको थियो । सो निर्देशनको अवज्ञा गर्दै विद्यालय सञ्चालनलाई निरन्तरता दिएपछि उनीहरुलाई पक्राउ गरिएको प्रमुख जिल्ला अधिकारी फणिन्द्रमणी पोखरेलले बताए ।

पटक–पटक सम्झाउँदा पनि विद्यालय बन्द गर्न नमानेपछि कारवाहीको दायरमा लिइएको उनले बताए । आज बिहान प्रमुख जिल्ला अधिकारी, सुरक्षा अधिकारी, राजविराज नगरपालिकाका प्रमुखसहितको टोलीले विद्यालय सञ्चालकलाई नियन्त्रणमा लिएको हो ।

उनीहरुलाई जिल्ला प्रहरी कार्यालयमा राखिएको छ ।