नेपालगन्ज । बाँकेमा कोरोना संक्रमणका कारण हालसम्म १८० जनाको मृत्यु भएको छ। बाँकेमा पछिल्लो २४ घण्टाको अन्तरालमा मात्र कोरोना थप तीन संक्रमितको मृत्यु भएको छ । एक संक्रमितले आत्महत्या गरेका छन् ।

कोहलपुरस्थित भेरी अस्पतालमा दुई जना र नेपालगञ्ज मेडिकल कलेज कोहलपुरमा एक जनाको उपचारको क्रममा मृत्यु भएको हो । यस्तै होम आइसोलेसनमा बसेका एक जनाले आत्महत्या गरेका छन् । कोहलपुर–९ का ६० वर्षीय बमबहादुर खत्रीले आत्महत्या गरेका हुन् ।

मेडिकल कलेज कोहलपुरमा ३६ वर्षीया महिलाको आज बिहान मृत्यु भएको हो । उनको वैशाख १० गते पीसीआर रिपोर्ट पोजेटिभ आएको थियो ।

यसैगरी बाँकेको खजुरा–३ की ४७ वर्षीया महिलाको शनिबार राति भेरी अस्पताल नेपालगञ्जमा मृत्यु भएको छ । उनी वैशाख १ गते अस्पताल भर्ना भएकी थिइन् ।

भेरी अस्पतालमै नेपालगञ्ज उपमहानगरपालिका–११ निवासी ६० वर्षीय पुरुषको मृत्यु भएको छ । उनको शनिबार राति मृत्यु भएको अस्पतालले जनाएको छ ।

बाँकेमा कोरोना संक्रमणका कारण हालसम्म १८० जनाको मृत्यु भएको छ।