पर्सा। वीरगन्जस्थित चिकित्सा विज्ञान अध्ययन संस्थान (वीरगन्ज नर्सिङ क्याम्पस) मा कार्यरत एक महिलाको कोरोना भाइरसका कारण मृत्यु भएको छ ।

आज बिहान उक्त नर्सिङ क्याम्पसमा कार्यरत ६१ वर्षीया महिलाको मृत्यु भएको अस्पतालका कोभिड कोर्डिनेटर डाक्टर सरोज रोशनदासले जानकारी दिए ।

गत मंगलबार कोरोना संक्रमण पुष्टि भएपछि उनलाई वीरगन्जस्थित नारायणी अस्पतालमा भर्ना गरिएको थियो।

यसअघि गत चैत अन्तिम साता उक्त क्याम्पसमा १९ विधार्थी र वार्डेनसहित ६ जना कर्मचारी गरी २५ जनामा संक्रमण पुष्टि भएको थियो ।

२५ जनामा संक्रमण भेटिएपछि चैत ३१ गते देखि क्याम्पस बन्द गरिएको छ । संक्रमण पुष्टि भएका १९ विधार्थी क्याम्पसमै आइसोलेसनमा छन्।

संक्रमित कर्मचारी भने आ -आफनो घरको होम आइसोलेसनमा रहेको डाक्टर रोशनदासले बताए।