बर्दिया। पछिल्लो समय बर्दियामा बाघको आतंक मौलाउँदै गएको छ।

आजपनि बाघको आक्रमणमा परि एक जना घाइते भएका छन्।

जिल्ला प्रहरी कार्यालय बर्दियाका अनुसार घाइते हुनेमा जिल्लाको गेरुवा गाउँपालिका १ जनकनगरका २३ वर्षीय तुलाराम थारु रहेका छन्।

उनलाई आज बिहान करिब ५ः३० बजेको समयमा खेतमा पानी चार्न गएको बेला पाटेबाघले आक्रमण गरि घाइते बनाएको हो।

घाइते थारुको टाउको, घाँटी र पिठ्युँमा चोट लागेको बर्दिया राष्ट्रिय निकुञ्ज सहायक संरक्षण अधिकृत अशिमकुमार थापाले जानकारी दिए।

घाइतेको अवस्था मध्यम रहेको जनाइएको छ भने यस क्षेत्रमा पाटेबाघले दिनहुँ जस्तो चौपाया बस्तुभाउ मार्ने गरेको छ।

बर्दियामा पाटेबाघको आक्रमणमा परी अहिलेसम्म १० जनाले ज्यान गुमाइसकेका छन्।