काठमाडौं । सभामुख अग्निप्रसाद सापकोटाले पछिल्ला घटनाक्रमले संसदलाई जीवन्त बनाउन चुनौती थपेको बताएका छन् ।

शनिबार संसदीय मामिला पत्रकार समाजको सातौं अधिवेशनलाई सम्बोधन गर्दै सभामुख सापकोटाले संसदलाई जीवन्त र जनमुखी बनाउन चुनौती थपिएपनि त्यसका लागि आफूले प्रयास गरिरहेको पनि बताए ।

संसदमा जनअपेक्षा अनुसार काम नभएको स्वीकार गर्दै सभामुख सापकोटाले ठूलाठूला बहसपछि संसदले गति लिन थालेकाले अब संसदले जनताको अपेक्षा अनुसार काम गर्ने विश्वास दिलाए ।

गत पुस ५ गतेदेखि फागुन ११ गतेसम्मका गतिविधि र बहसले राष्ट्रियतालाई थप बलियो बनाएको उनको दाबी छ ।

उनले भने–‘अहिले अलिकति अपेक्षाकृत ढङ्गले संसदले सिङ्गो राष्ट्रको, जनताको अपेक्षा पूरा गर्ने काममा प्रभावकारी भूमिका खेल्न सकेको छैन कि भन्ने खालको अथवा अलिकति सभामुखले पहलकदमी बढाउनुपर्छ भन्ने सुझाव भित्र, बाहिर, सबैतिरबाट तपाईहरुले उठाउनुभएको छ त्यसलाई म उच्च सम्मान गर्छु ।’