काठमाडौँ। महानगरीय प्रहरी वृत्त कालिमाटीमा रहेको महिला सेलले बलात्कार प्रयासको आरोपमा एक पाइलटलाई पक्राउ गरेको छ ।

पक्राउ पर्नेमा समिट एयरको जहाज चलाउने पाइलट सञ्जयकुमार साह रहेका छन् ।

पाइलट साहले गत फागुन २५ गते ३७ वर्षीया एक महिलालाई आफ्नो कोठामा बोलाई बलात्कार प्रयास गरेको उजुरी परेपछि पक्राउ गरिएको कालिमाटी प्रहरीले जनाएको छ।

ती महिलासँग पाइलटको लेनदेन भएको र लेनदेनकै लागि कोठामा बोलाएर बलात्कार प्रयास गरेको आरोप महिलाको छ । पाइलटले पटक-पटक गरेर आफूसँग ८ लाख लिएको तर नतिरेको आरोपसमेत महिलाले लगाएकी छिन् ।

कोटेश्वरस्थित आफ्नो कोठामा बोलाएर साहले आफ्नो अर्धनग्न भिडियोसमेत बनाएको महिलाले आरोप लगाएकी छन् ।