एजेन्सी । विकेटकिपर ब्याट्सम्यान जोस बटलरले उत्कृष्ट ब्याटिङ गरेपछि इंग्ल्यान्डले घरेलु टिम भारतलाई तेस्रो टी २० खेलमा ८ विकेटले पराजित गरेको छ। जितसँगै ५ खेलको सिरिजमा इंग्ल्यान्डले दुई एकको अग्रता लिएको छ।

मंगलबार राति भएको खेलमा भारतले दिएको १५७ रनको लक्ष्य इंग्ल्यान्डले २ विकेटको क्षतिमा १० बल बाँकी छँदै पूरा गर्‍यो।

इंग्ल्यान्डका लागि बटलरले अविजित ८३ रन बनाए । उनले ५२ बलमा ५ चौका र ४ छक्का हिर्काए। डविड मालनले १८ र जोनी वायस्टोले अविजित ४० रन बनाए । बलिङतर्फ भारतका युजभेन्द्र चाहल र वासिङटन सुन्दरले एक एक विकेट लिए।

यससअघि टस हारेर पहिले ब्याटिङ गरेको भारतले २० ओभरमा ६ विकेटको क्षतिमा १५६ रन जोड्यो । भारतका लागि कप्तान विराट कोहलीले अविजित ७७ रन जोडे । उनले ४६ बलमा ८ चौका र ४ छक्का हिर्काए।

यस्तै रोहित शर्माले १५, रिशव पन्तले २५, श्रेयस अयरले ९ तथा हार्दिक पाण्ड्याले १७ रन बनाए । बलिङमा इंग्ल्यान्डका मार्क उडले तीन तथा क्रिस जोर्डनले २ विकेट लिए ।