एजेन्सी । इंग्लिस क्लब आर्सनलले युरोपा लिग फुटबलअन्तर्गत अन्तिम १६ को पहिलो लेगमा सहज जित निकालेको छ ।

बिहीबार राति भएको खेलमा आर्सनलले ग्रीसको ओलम्पियाकोसलाई तीन एक गोल अन्तरले पराजित गरेको हो ।

ओलम्पियाकोसको मैदानमा आर्सनललाई जित दिलाउन मार्टिन ओएडेगार्ड, गाब्रियल र मोहमद एल्नेनीले एक एक गोल गरे ।

ओलम्पियाकोसका युसुफ एल अराबीले एक गोल फर्काए ।

खेलको ३४औं मिनेटमा मार्टिनले गोल गर्दै आर्सनललाई अग्रता दिलाएका थिए । खेलको ५८औं मिनेटमा युसुफले गोल गर्दै खेल एक एक गोलको बराबरीमा ल्याए ।

खेलको ८०औं मिनेटमा गाब्रियलले गोल गर्दै आर्सनललाई दुई एकको अग्रता दिलाए । त्यसपछि खेलको ८५औं मिनेटमा मोहमदले गोल गर्दै आर्सनललाई तीन एकको जित दिलाए ।

जितसँगै आर्सनलको अन्तिम आठको सम्भावना बलियो बनेको छ ।