काठमाडौँ। प्रधानमन्त्री केपी शर्मा ओलीले प्रचण्ड र माधव नेपाल आफ्नो पार्टी फुटाएर प्रधानमन्त्री बनिदेऊ भन्दै अर्को दैलोमा गएको आलोचना गरेका छन्।

शुक्रबार हस्ताक्षर कार्यक्रममा बोल्दै प्रधानमन्त्री ओलीले भने, ‘हामीले कसैलाई पनि प्रधानमन्त्रीको प्रस्ताव राखेका छैनौं र राख्दैनौं पनि’ ।

प्रचण्ड-माधवप्रति कटाक्ष गर्दै ओलीले भने, ‘संसदीय दलको बैठक बस्दै छन् रे ! म यता छु’ ।

कार्यक्रममा बोल्दै ओलीले नेपाल शान्तिपूर्ण युगमा प्रवेश गरेको भन्दै विप्लवले चालेको शान्तिपूर्ण राजनीतिको यो कदम साहसिक भएको बताए ।

शान्तिपूर्ण युगमा नेपाललाई प्रवेश गराउन योगदान दिएको भन्दै ओलीले विप्लवलाई धन्यवाद दिए । ओलीले सुशासन, भ्रष्टाचारको अन्त्य, विकासका प्रयास योजनाबद्ध ढंगले अगाडि बढुन् भन्ने नेपाली जनताको चाहना भएको बताए ।