एजेन्सी । वेष्ट इन्डिजका काउरन पोलार्डले टी २० आई क्रिकेटको एकै ओभरमा ६ छक्का प्रहार गरेका छन् ।

श्रीलंका विरुद्धको पहिलो टी २० खेलमा पोलार्डले अकिला धनन्जयको बलमा एकै ओभरमा ६ छक्का हानेका हुन् ।

धनन्जयले खेलको चौथो ओभरमा ह्याट्रिक विकेट लिएपनि छैटौँ ओभरमा भने पोलार्डलाई ३६ रन दिन पुगे । पोलार्डको ३८ रनको मद्दतमा वेष्ट इन्डिजले पहिलो टी २० मा श्रीलंकालाई ४ विकेटले पराजित गरेको छ ।

श्रीलंकाले दिएको १३२ रनको लक्ष्य वेस्ट इन्डिजले १३ दशमलव एक १ ओभरमा ६ विकेट गुमाएर पूरा गर्यो । यस्तै एभिन लेविसले २८ र लेन्डल सिमोन्सले २६ रन जोडे । ज्यासन होल्डर २९ रनमा अविजित रहे ।

श्रीलंकाका धनञ्जयले चौथो ओभरको दोस्रो बलमा इभिन लुइस, तेस्रो बलमा क्रिस गेल र चौथो बलमा निकोलस पुरनलाई पेभेलियन पठाउँदै ह्याट्रिक पूरा गरे ।

यस्तै श्रीलंकाका डी सिल्भाले ३ विकेट लिए । त्यसअघि टस हारेर ब्याटिङ गरेको श्रीलंकाले निर्धारित २० ओभरमा ९ विकेट गुमाउँदै १३१ रन बनाएको थियो ।

श्रीलंकाका लागि पाथुम निशनकाले ३९ र निरोशन डिक्वेलाले ३३ रन बनाए ।