काठमाडौं । महानगरीय अपराध महाशाखा प्रमुखमा प्रहरी वरिष्ठ उपरीक्षक (एसएसपी) चन्द्र कुँवेर खापुङको सरुवा भएको छ ।

१० महिनासम्म महाशाखाको प्रमुख भएर काम गरेका एसएसपी दिपक थापाको ठाउँमा खापुङको सरुवा भएको छ ।

स्रोतका अनुसार एसएसपी खापुङलाई गृह मन्त्रालयले काज सरुवा गरेको हो भने गृहमन्त्री रामबहादुर थापा ‘बादल’को निर्णयबाट महाशाखा प्रमुख दिपक थापाको प्रहरी प्रधान कार्यालय, नक्सालमा सरुवा भएको हो ।

थापाको कार्यकालमा महाशाखाले ठूला घटनाहरुमा सफलता हात पारेको छ । त्यस्तै पुराना घटनाहरुको अनुसन्धान पनि सफलतापूर्व सम्पन्न भएका थिए ।

नेकपाकी नेतृ रामकुमारी झाँक्रीलाई पक्राउ गर्न/नगर्न थापालाई ओली र प्रचण्ड समूहबाट ठूलो दबाब परेको थियो ।

झाँक्रीलाई पक्राउ गर्नु भन्दा अगाडि नै एउटा समूहले मिडियामा प्रचारबाजी गरेपछि झाँक्रीलाई राहत मिलेको थियो भने ओली सरकारमाथि दबाब परेको थियो ।

जसको कोपभाजनमा परेर अनुसन्धानमा राम्रो दख्खल भएका एसएसपी थापालाई १० महिनामै हेडक्वाटर तानिएको छ ।

एसएसपी थापा र महानगरीय प्रहरी कार्यालयका प्रमुख एआईजी हरी पालबीच पछिल्लो समय मनमुटाव बढेको थियो ।

त्यसैगरी प्रदेश नम्बर १ प्रहरी कार्यालयमा कार्यरत एसएसपी मधुसुदन लुइँटेलको लुम्बिनी प्रदेश प्रहरी कार्यालय र बाग्मती प्रदेश प्रहरी कार्यालयमा कार्यरत एसएसपी हरिराज वाग्लेको प्रहरी प्रधान कार्यालयमा सरुवा भएको छ।