काठमाडौं । आईजीपी शैलेश थापा क्षेत्रीले प्रहरी अधिकृतहरुलाई पदले अपेक्षा गरेअनुसारको व्यावसायिक भूमिका निर्वाह गर्न निर्देशन दिएका छन् ।

प्रहरी संगठनले आगामी दिनमा सामना गर्नुपर्ने चुनौतीलाई मनन गरी नियमित रूपमा भएको कार्यसम्पादनमा बढोत्तरी गर्दै संगठनको ओज तथा छविलाई निरन्तरता दिन सम्पूर्ण प्रहरी कर्मचारीहरू सतत् रुपमा लागिपर्ने अपेक्षा लिएको भन्दै आईजीपी क्षेत्रीले प्रहरीहरूले मद्दती भूमिका निर्वाह गर्दै उच्चतम व्यावसायिकता प्रदर्शन गरी काम गर्नुपर्नेमा जोड दिए ।

प्रहरी प्रधान कार्यालयमा आज ६० जना प्रहरी अधिकृतहरु दर्ज्यानी चिन्ह प्रदान गर्दै आईजीपी क्षेत्रीले प्रहरी अधिकारीहरुले थप उत्साहका साथ जिम्मेवारी वहन गर्दै उत्कृष्ट काम गर्ने लगायतका आफ्ना प्रतिवद्धताहरूलाई सबैले स्वीकारी काम गर्ने अपेक्षा आफूले लिएको बताए ।

नेपाल सरकार गृह सचिवस्तरको २०७७ माघ २६ गतेको निर्णयअनुसार प्रहरी नायव उपरीक्षक तथा नेपाल सरकार गृह सचिवस्तरको २०७७ माघ २८ गतेको निर्णयअनुसार प्राविधिक प्रहरी निरीक्षक पदमा पदोन्नति भएकामध्ये ६० जना प्रहरी अधिकृतहरु आज दर्ज्यानी चिन्हद्वारा सुशोभित भएका हुन् ।

दर्ज्यानी चिन्हद्वारा सुशोभित हुनेहरुमा प्रहरी निरीक्षकबाट प्रहरी नायव उपरीक्षक पदमा पदोन्नोति भएका ४६ जनामध्ये ३८ जना र विभिन्न समूहको प्राविधिक प्रहरी नायव निरीक्षकबाट प्राविधिक प्रहरी निरीक्षक पदमा पदोन्नोति भएका २३ जनामध्ये २२ जना प्रहरी अधिकृतहरु रहेका छन् ।

पदोन्नति भएका ८ जना प्रहरी नायव उपरीक्षकहरू र १ जना प्राविधिक प्रहरी निरीक्षक हाल यूएन मिसनमा कार्यरत रहेका छन्