काठमाडौं । सर्वोच्च अदालतले संवैधानिक निकायका पदाधिकारी नियुक्तिको विरुद्धमा परेको रिटमाथि विपक्षीसँग लिखित जवाफ माग गरेको छ ।

शुक्रवार न्यायाधीश कुमार रेग्मीको एकल इजलासले संवैधानिक निकायका पदाधिकारी नियुक्तिको विरुद्ध परेको रिटमाथि सुनुवाइ गर्दै सरकारसँग १५ दिनभित्र कारण पेश गर्न माग गरेको हो ।

संसद नै विघटन भएका बेला संवैधानिक सुनुवाइ बिनानै संवैधानिक निकायहरुमा नियुक्ति र सपथ भएको बताउँदै वरिष्ठ अधिवक्ता दिनेश त्रिपाठीले सर्वोच्चमा रिट दायर गरेका थिए ।

वरिष्ठ अधिवक्ता त्रिपाठीले सरकारले संविधान विपरीत संवैधानिक परिषदसम्बन्धी अध्यादेश ल्याएको दाबी गर्दै उक्त अध्यादेश संविधानको धारा २, ८३, २८४ र २९२ को बर्खिलाप भएको उल्लेख गरेका थिए ।

उक्त रिटमा राष्ट्रपति कार्यालय, प्रधानमन्त्री तथा मन्त्रिपरिषद कार्यालय र संवैधानिक परिषद्लाई विपक्षी बनाइएको छ । त्यस्तै संवैधानिक परिषद्मा गरिएका नियुक्तिविरुद्ध शुक्रवार सभामुख अग्निप्रसाद सापकोटाले पनि रिट दायर गरेका छन् ।