काठमाडाैँ । कोभिड–१९ विरुद्धको खोप तयार भएपछि छिटो ल्याउन सरकार–सरकार (जीटूजी) र निजी क्षेत्र दुवै सहभागी हुनुपर्ने देखिएको छ । सुविधाबाट पाउने खोपको मात्र भर पर्दा धेरै ढिला हुने भएकाले दुवै विकल्पमा तुरुन्त अघि बढ्नुपर्ने विज्ञहरुले बताएका छन् ।

एउटै प्रक्रियामा भर पर्दा समयमै खोप ल्याउन नसकिए मुलुकको स्वास्थ्य, रोजगार, अर्थतन्त्र, व्यापार, व्यवसायलगायत झन् प्रभावित हुन सक्ने उनीहरुको भनाइ छ । जनस्वास्थ्यविद् डा. सुरेश तिवारीले खोप ल्याउन सबै विकल्प खुला गर्नुपर्ने बताए ।

पछिल्लो समय कोरोनाबाट मृत्युदर बढेकाले पनि खोप प्रमाणित भएपछि जतिसक्दो छिटो ल्याउनुपर्ने अवस्था छ । ‘कोभाक्स तत्काल समाधान होइन । एउटा विकल्प सफल नहुँदा अर्को विकल्पले काम गर्न सक्छ,’ डा. तिवारी भन्छन् ।

दक्षिण एसियाका मुलुकले निजी क्षेत्रलाई खोप ल्याउन अनुमति दिइसकेको उनले बताए । ‘सरकारले अन्य सरकारसँग पहल गरेर खोप भित्र्याउने प्रयाससँगे विशेष गाइडलाइन बनाएर गुणस्तरीय खोप ल्याउने सुनिश्तितासहित पारदर्शीरुपमा अधिकतम बिक्री मूल्य तोकेर निजी क्षत्रका लागि प्रक्रिया खोल्नुपर्छ,’ उनले भने । आजको कान्तिपुर दैनिकमा समाचार छ ।