काठमाडौं । सञ्चार तथा सूचना प्रविधिमन्त्री पार्वत गुरुङले नेपाली जनताले पनि काेराेना खोपको उपभोग छिट्टै पाउने गरी आवश्यक व्यवस्था मिलाउन सरकार लागिपरेको बताएका छन् ।

बहत्तरौँ अन्तर्राष्ट्रिय मानव अधिकार दिवसका अवसरमा बुधबार आयोजित ‘भर्चुअल’ कार्यक्रममा मन्त्री गुरुङले जनतालाई निराश हुन नदिन तथा उनीहरुलाई राष्ट्र निर्माणका अभियानमा सम्पूर्ण रुपले सहभागी गराउन सरकारले पहल गरिरहेको बताए ।

फरक प्रसङ्गमा सरकारका प्रवक्तासमेत रहेका मन्त्री गुरुङले सूचनाको हक मानवअधिकारको प्रत्याभूति दिलाउने अनिवार्य शर्त भएकाे बताएका छन् ।

“सूचनाको हक मानवअधिकारको प्रत्याभूति दिलाउने अनिवार्य शर्त हो, त्यसलाई प्रभावकारी रुपमा अघि बढाउन मानवअधिकारकर्मी र सञ्चारकर्मीको भूमिका महत्वपूर्ण हुन्छ ।”

मानवाधिकार हनन नहुने गरी जनतालाई सुुसूचित गराउन गाउँगाउँमा इन्टरनेट सेवा विस्तारलाई प्राथमिकताका साथ अघि बढाइएको बताए ।