काठमाडौं । महानगरीय ट्राफिक प्रहरी महाशाखाले ३८ थान नक्कली चालक अनुमतिपत्रसहित एक जनालाई पक्राउ गरेकाे छ ।

पक्राउ पर्नेमा सिन्धुपाल्चोकको सांगाचोकगडी नगरपालिका-१२ घर भई हाल भक्तपुरको मध्यपुर ठिमी नगरपालिका-७ बस्ने २८ वर्षीय आशिष गिरी रहेका प्रहरीले जनाएकाे छ।

महानगरीय ट्राफिक प्रहरी महाशाखाको पीडित सहायता इकाईको टोलीले विशेष सूचनाको आधारमा उनलाई पक्राउ गरेको हो ।

उनको साथबाट नक्कली लाइसेन्ससहित मोटरसाइकल, विभन्नि बैंकका चेक समेत बरामद भएको महाशाखा प्रमुख प्रहरी बरिष्ठ उपरीक्षक जनक भट्टराईले जानकारी दिए । यसबारे थप अनुसन्धान भइरहेकाे प्रहरीले जनाएकाे छ।