काठमाडौं। अवकाशको मुखमा रहेका डिआइजीहरुलाई बाहिनीको इन्चार्जको जिम्मेवारी दिँदा सशस्त्र प्रहरी बलमा विकृति बढेको छ ।

आठमध्ये चार बाहिनीका डिआइजीको जागिर अवधि एक महिना मात्र बाँकी छ । अवकाशअघि उनीहरुको ध्यान शान्ति सुरक्षा भन्दा असुलीमा केन्द्रित भएको समाचार छ ।

२ नम्बर प्रदेशका डिआइजी कृष्णभक्त ब्रम्हाचार्य, गण्डकी प्रदेशका डिआइजी राजेन्द्र बस्नेत, ६ नम्बर प्रदेशका डिआइजी हरिश्चन्द्र अधिकारी, ७ नम्बर प्रदेशका डिआइजी हरिशंकर बुढाथोकी मंसिर अन्तिम साताबाट अवकाश पाउँदैछन् ।

अवकाशअघि उनीहरुले मातहतका गणका इन्चार्जहरुलाई खर्च माग्दै अनावश्यक दुःख दिएको स्रोत बताउँछ । केही गणपतिहरु भने डिआइजीसँगै मिलेर सेटिङमै तस्करीको लाइन खुलाएका छन् ।

गण्डकी प्रदेशका डिआइजी पोखरेल त अनुगमनका नाममा सपरिवार घुमघाममा निस्किएका छन् । खर्च पठाउन भन्दै उनले दुःख दिँदै आएको एक गणपतिले बताए । प्रदेश नम्बर २ मा पनि डिआइजीकी निर्देशनमा विभिन्न नाकाबाट तस्करी भइरहेको छ । चाडपर्वको समयमा भारतबाट तस्करी मौलाउने गरेको छ ।

त्यस्तै सशस्त्र प्रहरी एकेडेमीमा कार्यरत एआइजी नारायणबाबु थापा पनि अवकाशअघि घुमघाममा निस्किएका छन् । पुस २९ गतेबाट अवकाश हुन लागेका एआईजी थापा यतिखेर ६ नम्बर प्रदेशको उत्तरी क्षेत्र घुमघाममा छन् ।

डोल्पाको सेफोक्सुन्डो ताल पुगेका उनी त्यहाँबाट मुगुको रारा पुगेका छन् । अवकाशअघि यसरी घुम्न जाँदा जिल्लाका सशस्त्र प्रहरीले आतिथ्यता दिने भएकाले उनी घुम्न निस्किएको चर्चा हलचोकमा छ ।

उता चाडपर्वको समयमा तराईका जिल्लाहरुमा सशस्त्र प्रहरीकै जिल्ला इन्चार्जहरुको मिलमेतोमा तस्करी मौलाएको छ । सिं स २ का एसपीहरुलाई गणपति बनाएपछि कार्यशैलीमा सुधार आउने अपेक्षा गरिएपनि उनीहरु पनि पैसा कमाउनमै तल्लिन देखिएका छन्,दृष्‍टि साप्ताहिकमा खबर छ ।