काठमाडौं । प्रधानमन्त्री केपी शर्मा ओलीले डा. गोविन्द केसी अनसनबारे चासो देखाएका छन् ।

मंगलबार अपरान्ह बालुवाटारमा आयोजित (नेपाल कम्युनिस्ट पार्टी (नेकपा) सचिवालय बैठकमा नेताहरुले डा. केसीको जीवनरक्षाका बारेमा चासो राखेपछि प्रधानमन्त्री ओलीले केसीका माग पूरा गर्न सरकारले वार्ता सुरु गरेको बताएका थिए ।

नेकपाको मंगलबार अपरान्ह बसेको सचिवालय बैठक अनशनरत डा.गोविन्द केसीमाथि नै केन्द्रित भएको थियो ।

सचिवालयका नेताहरुले डा.केसीको जीवन रक्षाबारे सरकारले ठोस कदम चाल्नुपर्ने कुरा उठाएपछि बैठक त्यसैबारे केन्द्रित भएको एक सचिवालय सदस्यले जानकारी दिए ।

विभिन्न ६ बुँदे माग राख्दै डा.केसी २३ दिनदेखि अनशनरत छन् । १९ औं पटक अनशन बसेका डा. केसीले यसपटक विकट क्षेत्रमा चिकित्सा शिक्षासहित कोरोना संक्रमणबाट नागरिकको जीवन रक्षा गर्न पनि माग गरेका छन् ।

केसी अनसन बसेको २३ दिन पछि बल्ल सरकारले चासो दिन थालेको हो ।

यसैबीच सचिवालय बैठकमा धेरैको चासो रहेको मन्त्रिपरिषद् पुनर्गठनबारे प्रधानमन्त्रीका तर्फबाट कुनै प्रस्ताव पेश नै भएकाे थिएन ।

असोज ४ गतेको सचिवालय बैठकले नै मन्त्रिपरिषद् पुनर्गठनको जिम्मा अध्यक्षद्वय ओली र पुष्पकमल दाहाल प्रचण्डलाई दिएकाले यसबारे छलफल नभएको सचिवालय स्राेतले बतायाे ।

बैठकपछि प्रवक्ता नारायणकाजी श्रेष्ठले पनि दुई अध्यक्ष यसबारे गृहकार्यमै रहेकाले मन्त्रिपरिषदबारे छलफल नभएको बताएका थिए ।

भदौ २६ को स्थायी कमिटीले गरेको निर्णयअनुसार, मन्त्रिपरिषद् पुनर्गठनबारे नेकपामा लगातार छलफल भइरहेको छ । सोमबार दिउँसो मात्रै पनि दुई अध्यक्ष ओली–प्रचण्डबीच मन्त्रिपरिषद् पुनर्गठनबारे छलफल भएको थियो ।