काठमाडौं । सञ्चारकर्मी तथा आख्यानकार विजय कुमारले यतिबेला आफ्नो दोस्रो कृति बजारमा ल्याएका छन् ।

पहिलो कृति खुसी ल्याएर मदन पुरस्कार जितेका विजय कुमारले यतिबेला नयाँ पुस्तक ‘सम्बन्धहरू’ बजारमा ल्याएका हुन् । विजय कुमारको दोस्रो कृति सम्बन्धहरू बिहीबार सार्वजनिक गरिएको छ ।

यो पुस्तक अस्ट्रेलिया र न्युजिल्यान्डमा भने केही दिनअघि सार्वजनिक गरिएको प्रकाशक संस्था फाइन प्रिन्टले जानकारी गराएको छ । मुलुकमा कोभिड–१९ कोरोनाको संक्रमण बढेका कारण कुनै औपचारिक कार्यक्रम नगरी पुस्तक बजारमा पठाइएको फाइनप्रिन्टका सहसंस्थापक निरज भारीले बताएका छन् ।

अघिल्लो पुस्तक खुसीबाट पाठकको मन जितेका विजय कुमारको यो पुस्तक पनि त्यतिकै राम्रो बनाएका छन् । प्रकाशन संस्थाका अनुसार सम्बन्धहरू जीवनको अस्थायीपनको किताब हो ।

अनित्य र क्षणिकताबीच पनि प्रेम, साहस र अमरत्वको खोजलाई उनले यो पुस्तकमा समेटेका छन् । मदन पुरस्कार प्राप्त लेखकको यो दोस्रो कृति सिर्जनात्मक गैरआख्यान शैलीमा तयार गरिएको पनि फाइन प्रिन्टले जनाएको छ ।