काठमाडाैं । महानगरीय प्रहरी वृत्त, बौद्धले दुर्लभ वन्यजन्तु सुनगोहोरोसहित दुई जनालाई पक्राउ गरेको छ ।

प्रहरीले सोमबार साँझ कागेश्वरी मनोहरा नगरपालिका-६ मुलपानी बस्ने रामेछापकाे गोकुलगंगा गाँउपालिका-६ का २१ वर्षीय विशाल तामाङ र १९ वर्षीय सुभाष तामाङलाई पक्राउ गरेको हो ।

उनीहरूले सुनगोहोरो जस्तो देखिने दुर्लभ वन्यजन्तुको विक्री वितरण गर्न चकलेटकाे बट्टामा लुकाई राखेको भन्ने विशेष सूचनाका आधारमा प्रहरीले अनुसन्धान थालेको थियो ।

उनीहरूबाट १.५ इन्च लामो जिउँदो सुनगोहोरो समेत बरामद गरेको छ। उनीहरूमाथि थप अनुसन्धान गर्न बौद्धमा ल्याइएको थियो ।

साथै, अनुसन्धान तथा कारबाहीको लागि जिल्ला वन कार्यालय काठमाडौंसँग समेत समन्वय गरी वन कार्यालय पठाउने व्यवस्था गरेको महानगरीय प्रहरी परिसर, एसपी सोमेन्द्रसिंह राठौरले जानकारी दिए ।

बौद्धका डिएसपी नविन कार्कीका अनुसार उनीहरूले सुनगोहोरो रामेछापबाट समातेर ल्याएका थिए। ‘उनीहरूलाई १५ लाखको डिल आएपछि काठमाडौं ल्याएर बेच्न लागेका रहेछन्,’डिएसपी कार्कीले भने। उनीहरूमाथि वन कार्यालयले थप अनुसन्धान गरिरहको छ।