काठमाडौं । स्वास्थ्य तथा जनसंख्या मन्त्रालयले पाठेघरको मुखको क्यान्सरविरुद्ध लगाइने ह्युमनपापिलोमा भाइरस (एचपीभी) खोप ल्याएको छ ।

स्वास्थ्य सेवा विभागको आपूर्ति व्यवस्थापन महाशाखाका निर्देशक डा. पवनजंग रायमाझीले चार लाख ६० हजार ९४० मात्रा खोप ल्याइएको बताए । ती खोप टेकुस्थित भण्डारण कक्षमा राखिएको र विस्तारै प्रदेशमा पठाइने उनले जानकारी दिए ।

एचपीभी खोपका निम्ति ग्लोबल एलायन्स (गाभी)को सहयोगमा ती नेपाल ल्याइएको हो । सरकारले किशोरीलाई सानै उमेरदेखि क्यान्सरबाट जोगाउन आउँदो माघ २३ गतेदेखि खोप अभियान सञ्चालन गर्न लागेको छ ।

१५ दिने अभियानअन्तर्गत कक्षा–६ देखि १० सम्म र विद्यालयबाहिर रहेका १० देखि १४ वर्ष उमेर समूहका १६ लाख ८८ हजार ९०० किशोरीमा खोप लगाइने बालस्वास्थ्य तथा खोप शाखाका प्रमुख डा. अभियान गौतमले जानकारी दिए । उनका अनुसार, १७ लाख ७० हजार मात्रा गाभीले नेपाललाई उपलब्ध गराउनेछ ।