काठमाडौं । गृह मन्त्रालयले सहसचिव डा. भीष्मकुमार भुषाललाई कारबाहीस्वरुप मन्त्रालयबाट हटाएको छ ।

मन्त्रालयको विपद् तथा द्वन्द्व व्यवस्थापन महाशाखाको प्रमुख रहेका उनलाई केही दिनअघि राष्ट्रिय विपद् जोखिम न्यूनीकरण तथा व्यवस्थापन प्राधिकरणमा सरुवा गरिएको छ ।

गृह मन्त्रालय स्रोतका अनुसार राष्ट्रिय परिचयपत्र तथा पञ्जीकरण विभागका एक अधिकृत जान लागेको विदेश भ्रमणसम्बन्धी कार्यक्रममा भुषाल आफैँ जान खोजेका थिए ।

अधिकृतको नाम काटेर आफ्नो नाम राखी स्वीकृतिका लागि मन्त्रीलाई पेस गरे । सो कुरा थाहा पाएपछि गृहमन्त्री रमेश लेखकले उनलाई गाली गरेका थिए । सोही कारण उनलाई मन्त्रालयबाट हटाइएको छ । सहसचिव भुषाल ६ महिनामा तीन पटक विदेश भ्रमणमा गइसकेका छन् ।

विपद् महाशाखामा सहसचिव डा।टोकराज पाण्डेलाई जिम्मेवारी दिइएको छ । पाण्डे यसअघि मन्त्रालयकै नीति, योजना, अनुगमन महाशाखामा कार्यरत थिए । सो महाशाखामा भने आनन्द काफ्लेलाई तोकिएको छ । काफ्ले यसअघि जिम्मेवार विहीन थिए ।