पाल्पा । पाल्पामा एउटा ट्रकले अर्कोलाई ठक्कर दिँदा चालकको मृत्यु भएको छ।

सिद्धार्थ राजमार्गअन्तर्गत बर्तुङ–राम्दी सडकखण्डमा ट्रकले ट्रकलाई ठक्कर दिँदा भएको दुर्घटनामा एक जनाको मृत्यु भएको हो।

बुटवलबाट पोखरातर्फ जाँदै गरेको लु १ ख ९३५१ नम्बरको ट्रक अचानक अनियन्त्रित भई सोही दिशा जाँदै गरेको ना १ क ७१२१ नम्बरको ट्रकलाई पछाडिबाट ठक्कर दिएको थियो ।

ठक्करबाट ब्रेक फेल भएर दुर्घटनामा परेको लु १ ख ९३५१ नम्बरको ट्रकका चालक रम्भा गाउँपालिका–३, पिपलडाँडाका २३ वर्षीय भुवनसिंह रानाको मृत्यु भएको हो।

आफैंले चलाएको ट्रकमा दाहिने खुट्टा च्यापिएर घाइते भएका रानालाई उद्धार गरीलुम्बिनी मेडिकल कलेज प्रभासमा पठाएकामा उपचारका क्रममा मृत्यु भएको जिल्ला प्रहरी कार्यालय पाल्पाले जनाएको छ ।

ना १ क ७१२१ नम्बरको ट्रकका सह–चलक स्याङ्जाको वालिङ नगरपालिका–१० का २१ वर्षीय सन्जित खवास थापा घाइते भएका छन् ।