मकवानपुर । मकवानपुरमा धारिलो हतियार खुकुरी देखाई लुटपाट गरेको आरोपमा दुईजना पक्राउ परेका छन् ।

पक्राउ पर्नेमा हेटौंडा उपमहानगरपालिका-११ का २० वर्षीय असमिन चौलागाईं र सोही स्थानका २० वर्षीय अनिस चौलागाईं रहेका छन् ।

शनिबार दिउँसो अस्थायी प्रहरी पोष्ट थानाभर्याङबाट खटिएको प्रहरी टोलीले उनीहरुलाई धारिलो हतियार र सुनको सिक्रीसहित पक्राउ गरेको मकवानपुर प्रहरीले जनाएको छ ।

पक्राउ परेका उनीहरूले हेटौंडा उपमहानगरपालिका-११ थानाभर्‍याङमास्थित राप्ती खोलाको बगरमा बकैया गाउँपालिका-४ बस्ने २० वर्षीय मनिष फुयाँल र सोही स्थान बस्ने २४ वर्षीय सुजन पौडेललाई धारिलो हतियार खुकुरी देखाई १ तोलाको सुन लुटेको आरोप छ ।

पक्राउ परेका दुईजना उपर चोरी तथा डाँका सम्बन्धी कसुर मुद्दामा मकवानपुर जिल्ला अदालतबाट ४ दिनको म्याद अनुमति लिई प्रहरीले थप अनुसन्धान कार्य थालेको छ ।