काठमाडौं । नेकपा (एकीकृत समाजवादी) का उपमहासचिव मेटमणि चौधरीले लिपुलेक कालापानी भारतको हो भनेपछि विवादमा तानिएका छन् ।

भदौ २५ गते प्राइम टीभीमा दिएको अन्तरवार्तामा चौधरीले लिपुलेक र कालापानीमा भारतको दाबी पुग्ने अभिव्यक्ति दिएका थिए । सो अभिव्यक्तिपछि उनी विवादमा तानिएका हुन् । एकीकृत समाजवादीले उपमहासचिव मेटमणि चौधरीलाई स्पष्टिकरण सोधेको छ ।

महासचिव घनश्याम भूसालले चौधरीलाई स्पष्टीकरण सोध्दै लेखेको पत्रमा भनिएको छ, ‘अनेकौं तथ्यहरुले उक्त भूभाग नेपालको हो भन्ने कुरा स्पष्ट पारेका छन् । हाम्रो पार्टीको समेत दाबीका आधारमा उक्त भूभाग संविधानको अंग बनाइएको कुरा सर्वविदितै नै छ । त्यसविपरीत, मुलुकको अखण्डता र सार्वभौसमसत्ताका विरुद्ध तपाईंले किन बोल्नु भएको हो ?’

चौधरीलाई ३ दिनभित्र लिखित स्पष्टीकरण दिन निर्देशन दिइएको छ । उनले अन्तरवार्तामा लिपुलेक र कालापानी भारतले दाबी गर्छ । भारतको दाबी पुग्छ, उसको दाबी पुग्छ ‘ जस्ता अभिव्यक्ति दिएका थिए ।