धनगढी । राष्ट्रिय प्रहरी प्रशिक्षण प्रतिष्ठान महाराजगंजका कार्यकारी निर्देशक एआईजी सुदिप गिरीले सुदूरपश्चिम प्रदेश प्रहरी कार्यालय धनगढीको निरीक्षण गरेका छन् ।

एआईजी गिरीले नेपाल प्रहरीको सेवा प्रभावकारीताको मुल्याङ्कनका लागि सुदूरपश्चिम प्रदेश प्रहरी गण, नेपाल प्रहरी बिद्यालय धनगढी र जिल्ला ट्राफिक प्रहरी कार्यालय कैलालीको निरीक्षण गरेका हुन् ।

अन्तर प्रहरी कार्यालय कार्यदक्षता केन्द्रिय मूल्यांकन समितिका संयोजकसमेत रहेका एआईजी गिरीले सुदूरपश्चिम प्रदेश प्रहरी कार्यालय धनगढी लगायत मातहत कार्यालयहरुको स्थलगत रुपमा निरीक्षण भ्रमण तथा अवलोकन गरेका थिए ।

निरीक्षणका क्रममा एआईजी गिरीले कार्यालयका सम्पूर्ण शाखाहरु, अभिलेख व्यवस्थापन, जनशक्ति व्यवस्थापन, भौतिक पूर्वाधार व्यवस्थापन र अपराध अनुसन्धानको अवस्था तथा विश्लेषण गर्न मातहत कार्यालयहरुलाई निर्देशन दिए ।

उनले प्रशासनिक गतिबिधी, सुरक्षा तथा प्रहरी कार्य, हातहतियारको अवस्था, शान्ती सुरक्षाका लागि प्रहरीबाट थालनी गरीएका नयाँ अभ्यासहरु लगायतका विषयमा पनि जानकारी लिएका थिए ।

‘नेपाल प्रहरी कार्यदक्षता मुल्यांकन मापदण्ड २०८१’ समितिका अध्यक्ष रहेका एआईजी गिरीले सम्पुर्ण प्रहरी कर्मचारीहरूलाई पदीय दायित्व निर्वाह गर्न निर्देशन दिए ।