काठमाडौं । नेपाल टेलिकमको प्रबन्ध निर्देशक(एमडी) नियुक्ति प्रकृया थप लम्बिने भएको छ । एमडी नियुक्तिका लागि सञ्चार तथा सूचना प्रविधि मन्त्रालयले २२ जेठमा दरखास्त आह्वान खुलाएकोमा १७ जनाले आवेदन दिएका थिए ।

त्यसमध्ये तीन जनालाई तत्कालित सञ्चार सचिव रामकृष्ण सुवेदी नेतृत्वको सिफारिस समितिले सर्टलिष्टमा राखेको थियो ।

एमडी छान्न गठित सिफारिस समितिले डा. विमल आचार्य, अनिलकुमार झा र संगीता पहाडी (अर्याल) को नाम छानेर खामबन्दी गरेको थियो । तर, नयाँ सरकार गठनसँगै विचौलिया र ठेकेदारको चलखेल ह्वात्तै बढेपछि विहिबारको मन्त्रीपरिषद् बैठकले एमडी नियुक्ति गर्न सकेन ।

स्रोतका अनुसार नेपाली सेना र टेलिकमको ठेक्कापट्टामा सक्रिय ठेकेदार लोकेन्द्र कार्कीले टेलिकमकै निमित्त प्रवन्ध निर्देशक संगीता पहाडीलाई एमडी बनाउन ठूलो आर्थिक चलखेल गरी उच्च राजनीतिक तहमा समेत लविङ गरेका कारण नियुक्ति प्रकृया अवरुद्धको अवस्थामा पुगेको छ ।

ठेकेदार कार्कीले पछिल्लो समय बालुवाटारसम्म सम्बन्ध विस्तार गरेको हल्ला पिटाएर चलखेल गरिरहेको स्रोत बताउँछ । त्यस्तै संगीताका श्रीमान कर्णेल विश्वबन्धु पहाडी पनि सेनाको काम भन्दा श्रीमतीलाई एमडी बनाउन राजनीतिक दलका नेताहरुको घर धाइरहेको स्रोत बताउँछ ।

अर्को पनि पढ्नैपर्ने

श्रीमतीको नाममा डलरमा घुस बुझ्ने अधिकारी ११औं तहमा बढुवा सिफारिस

उनी श्रीमतीलाई एमडी बनाउन कार्यालय समयमै सञ्चार तथा सूचना प्रविधि मन्त्री पृथ्वीसुब्बा गुरुङको कार्यकक्षमा पुगेर लविङ गर्दै आएको मन्त्रालयका एक उपसचिवले बताए । पहाडी एमाले महासचिव इश्वर पोखरेलदेखि प्रधानमन्त्री केपी शर्मा ओली निकट विचौलियासँग समेत पुग्ने गरेको स्रोत बताउँछ ।

अघिल्लो पुष्पकमल दाहाल ‘प्रचण्ड’ नेतृत्वको सरकारका पालामा उल्लेखित तीन जनाको नाम छनौट गरिएकोमा हालको सरकारले उनीहरुमध्ये कसैलाई पनि नियुक्ति गर्न चाहिरहेको छैन ।

किनकी तीनै जनाले तत्कालिन प्रधानमन्त्री प्रचण्डकी पुत्री गंगा दाहालदेखि सञ्चार मन्त्री रेखा शर्मासम्म चर्को लविङ गरि अन्य १४ जनालाई प्रतिस्पर्धामै आउन दिएका थिएनन् ।

यो विषयमा पनि मन्त्रीपरिषद बैठकमा छलफल भएको स्रोतले बतायो । स्रोतका अनुसार नयाँ प्रकृयामा गएर आवेदन माग गरी एमडी छनौट गर्न मिल्ने कि नमिल्ने भन्ने बारेमा सञ्चार तथा सूचना प्रविधि मन्त्रालयले महान्यायाधिवक्ताको कार्यालयसँग आज (शुक्रबार) पत्र पठाएर राय माग गरेको छ ।

महान्यायाधिवक्ताको कार्यालयले जवाफ पठाएपछि मात्रै एमडी नियुक्ति प्रकृया शुरु हुने मन्त्रालय स्रोतको भनाइ छ ।

स्रोतका अनुसार नयाँ सरकार गठनपछि ठेकेदार कार्कीमार्फत संगीताका श्रीमान विश्वबन्धुले महान्यायाधिवक्ता रमेश वडालसँग भेट समेत गरिसकेका छन् ।

महान्यायाधिवक्ता वडाल संगीताप्रति सकारात्मक रहेका कारण नयाँ प्रकृयामा नगई पुरानै प्रकृयाबाटै एमडी नियुक्ति गर्नुपर्ने राय पठाउने सम्भावना रहेको छ । यसका लागि संगीता नै उपयुक्त पात्र बन्न सक्ने टेलिकमका एक अधिकारी बताउँछन् ।