काठमाडौं । शुक्रराज ट्रपिकल तथा सरुवा रोग अस्पतालमा उपचाररत ललितपुरका एकजना बालकमा हैजा पुष्टि भएको छ ।

ललितपुरको गोदावरी नगरपालिका वडा नम्बर १४ को एक पुनर्स्थापना केन्द्रमा बस्दै आएका १६ वर्षीय बालकमा हैजा पुष्टि भएको हो ।

हैजाको लक्षण सहित उपचारका लागि शुक्रराज अस्पतालमा ल्याइएका ती बालकको राष्ट्रिय जनस्वास्थ्य प्रयोगशालामा कल्चर गराउँदा हैजा पुष्टि भएको अस्पतालले जनाएको छ ।

सोही स्थानबाट हैजाकै लक्षण देखिएका अर्का एक बालकको पनि शुक्रराज अस्पतालमा उपचार भइरहेको छ । उनको हैजा परीक्षण गरिएको छ भने रिपोर्ट आउन बाँकी छ।