काठमाडौं । पूर्वमन्त्री तथा सांसद वीरेन्द्र महतोले छोराको प्रमाणपत्र समकक्षता प्रमाणीकरणका लागि घुस दिनुपरेको घटनालाई लिएर शिक्षा, विज्ञान तथा प्रविधि मन्त्रालयले छानबिन समिति गठन गरेको छ ।

शिक्षामन्त्री विद्या भट्टराईले शिक्षा तथा मानव स्रोत विकास केन्द्रका उपमहानिर्देशकको संयोजकत्वमा तीन सदस्यीय छानबिन समिति गठन गरेकी हुन् ।

मन्त्रालयका प्रवक्ता केशवप्रसाद दहालले मंगलवार एक विज्ञप्ति जारी गर्दै शिक्षा, विज्ञान तथा प्रविधि मन्त्रालयअन्तर्गत पाठ्यक्रम विकास केन्द्रबाट जारी हुने समकक्षताको प्रमाणपत्र प्रदान गर्ने विषयमा छानबिन समिति गठन गरिएको जानकारी दिए ।

समकक्षताको प्रमाणपत्र लिँदा अपनाउनुपर्ने प्रक्रिया, सोमा लाग्ने दस्तुर लगायतका विषयबारे आवश्यक छानबिन गरी सात दिनभित्र सुझावसहितको प्रतिवेदन पेश गर्न समितिलाई कार्यादेश तोकिएको छ ।

यसअघि जसपा नेपालका सांसद महतोले आफूले छोरोको सर्टिफिकेट प्रमाणित गर्न शिक्षा मन्त्रालयअन्तर्गत सानोठिमीको एक कार्यालयमा ५ हजार रुपैयाँ घुस दिएको आइतवार संसदमा बताएका थिए ।