काठमाडौं । राष्ट्रिय स्वतन्त्र पार्टी (रास्वपा) का निलम्बित महामन्त्री मुकुल ढकालले उपसभामुख इन्दिरा राना प्रकरणका केही प्रमाण आफूसँग रहेको बताएका छन् ।

मंगलबार बिहान सामाजिक सञ्जालमार्फत् ढकालले यस्तो बताउँदै उपसभामुख इन्दिरामाथि राज्यले छानबिन गर्नुपर्ने माग गरेका हुन् । उनले आफूले सुरुदेखि नै उपसभामुखलाई घटनाबारे प्रश्न गरे पनि पार्टी नेतृत्वले नजरअन्दाज गर्दै आएको बताए ।

आफूसँग उक्त घटनाका केही प्रमाण रहेको भन्दै राज्यले सोधपुछ र छानबिनका लागि बोलाए आफूसँग भएका प्रमाण दिन तयार रहेको ढकालले बताएका छन् ।

आफूले सुरुमा घटनाबारे जानकारी लिन खोज्दा उपसभामुखले थाहा छैन भने पनि पछि एकजनाको नाम बताएको पनि उनले बताएका छन् । ढकालले आर्थिक लेनदेन भएको प्रमाण पीडितसँग रहेको पनि उल्लेख गरेका छन् ।

ढकालले उपसभामुख इन्दिरा रानामगर प्रकरणबारे धारणा सार्वजनिक गर्दै एक वर्षअघि उपसभामुखको सचिवालयले अमेरिका पठाइदिने भन्दै पैसा लिएको उजुरी पार्टीमा आएको बताए ।