कैलाली । कैलालीमा झण्डै ११ लाख मूल्यको अवैध सामानसहित दुईजना पक्राउ परेका छन् ।

जिल्ला प्रहरी कार्यालय कैलालीबाट प्रहरी नायव निरीक्षक गजेन्द्रबहादुर चन्दको कमाण्डमा खटिएको प्रहरी टोलीले १० लाख ७२ हजार मूल्यको अवैध सामानसहित सरस्वती विक र हरि बुढालाई पक्राउ गरेको हो ।

कञ्चनपुरको पुनर्वास नगरपालिका–१ का ३१ वर्षीय हरिले चलाएको सुदूरपश्चिम प्रदेश ०१–००१ ज १२७९ नम्बरको म्याजिक गाडीमा अवैध सामान फेला परेको थियो । सो गाडीमा सवार धनगढी उपमहानगरपालिका–९ की ४० वर्षीया सरस्वती विक सवार थिइन् ।

भारतबाट ल्याएको अवैध सामान, सेन्डो, लेडिज मोजा र जेन्स मोजा गरेर १० लाख ७२ हजार मूल्यको मालसामान नियन्त्रणमा लिएर त्रिनगर भन्सार कार्यालय पठाउने तयारी भइरहेको जिल्ला प्रहरी कार्यालय कैलालीले जनाएको छ ।

प्रहरीले धनगढी उपमहानगरपालिका–१ नवदुर्गा मन्दिर नजिकबाट अवैध सामानसहित दुवै जनालाई नियन्त्रणमा लिएको थियो ।