काठमाडौं । आईसीसी टी–२० विश्वकप क्रिकेटमा ‘सुपर–आठ’ को आफ्नो दोस्रो खेलमा दक्षिण अफ्रिकाले इंग्ल्याण्डलाई पराजित गरेको छ ।

सेन्ट लुसियामा ड्यारेन सामी क्रिकेट मैदानमा गए राति भएको समूह–२ को खेलमा साविक उपाधि विजेता इंग्ल्याण्ड ७ रनले पराजित भएको हो ।

दक्षिण अफ्रिकाले दिएको १६४ रनको लक्ष्य पछ्याएको इंग्ल्याण्डले २० ओभरमा ६ विकेट गुमाएर १५६ रन मात्रै बनाउन सक्यो । इंग्ल्याण्डका ह्यारी ब्रुकले सर्वाधिक ५३ रन बनाए । दक्षिण अफ्रिकाका कागिसो रबाडा र केशव महाराजले समान २ विकेट लिए ।

त्यसअघि टस हारेर ब्याटिङ गरेको दक्षिण अफ्रिकाले २० ओभरमा ६ विकेट गुमाएर १ सय ६३ रन बनाएको थियो । दक्षिण अफ्रिकाका क्विन्टन डी ककले सर्वाधिक ६५ रन बनाए ।

यस्तै डेभिड मिलरले ४३ रन जोडे । इंग्ल्याण्डका जोफ्रा आर्चरले ३ तथा मोइन अली र अदिल रसिदले समान १ विकेट लिए ।