धनुषा । धनुषाको महेन्द्रनगरबाट आठ दिनअघि बेपत्ता एक महिलाको शव फेला परेको छ ।

क्षीरेश्वरनाथ नगरपालिका–५, महेन्द्रनगरकी २८ वर्षीया रुबी यादवको शव सडेको अवस्थामा शनिबार भेटिएको हो ।

मिथिला नगरपालिका–५, स्थित औरही सामुदायिक वनमा ती महिलाको शव भेटिएको इलाका प्रहरी कार्यालय महेन्द्रनगरले जनाएको छ ।

रुबीको श्रीमान् राजनारायण यादव केही महिनाअघि वैदेशिक रोजगारीबाट फर्केका थिए । स्वदेश फर्किएपछि यादवसँग निरन्तर झगडा हुँदै आएको थियो ।

गत शनिबारदेखि हराइरहेकी रुबीको खोजी गर्न उनका भाइ अनितले इलाका प्रहरी कार्यालय महेन्द्रनगरमा उजुरी दिएका थिए ।

रुबी बेपत्ता भएको उजुरी परेपछि सम्भावित स्थानमा खोजतलास गर्दा शनिबार राति मिथिला नगरपालिका–५, स्थित औरही सामुदायिक वनमा शव फेला परेको प्रहरीले जनाएको छ ।

रुबी बेपत्ता भएको उजुरी पर्ने बित्तिकै रुबीका श्रीमान् राजनारायण यादवलाई प्रहरीले नियन्त्रणमा लिएका थिए ।

उनले श्रीमतिको हत्या गरेको स्वीकार गरेका छन् । शव परीक्षणका लागि प्रादेशिक अस्पताल पठाइएको इलाका प्रहरी कार्यालय महेन्द्रनगरले जनाएको छ ।