एजेन्सी । दक्षिण कोरिया र यूएईले व्यापक आर्थिक साझेदारी सम्झौतामा हस्ताक्षर गरेका छन् ।

दक्षिण कोरियाको अरब देशसँगको यो पहिलो स्वतन्त्र व्यापार सम्झौता हो ।

दक्षिण कोरियाली राष्ट्रपति युन सुक–योल र संयुक्त अरब इमिरेट्सका राष्ट्रपति मोहम्मद बिन जायद अल नाह्यानले सियोलमा आयोजित शिखर वार्तापछि व्यापार उदारीकरण र लगानी विस्तारजस्ता क्षेत्रहरूमा द्विपक्षीय आर्थिक साझेदारीलाई सुदृढ पार्न यो सम्झौता गरिएको हो।

यूएई दक्षिण कोरियासँग स्वतन्त्र व्यापार सम्झौतामा पुग्ने पहिलो अरब राष्ट्र बनेको छ । यूएईको सार्वभौम सम्पत्ति कोषले पनि दक्षिण कोरियामा ३० अर्ब डलर लगानी गर्ने आफ्नो प्रतिबद्धता पुनः पुष्टि गरेको छ ।

दुवै पक्षले जलवायु परिवर्तन, ऊर्जा, पूर्वाधार, आणविक ऊर्जा, बौद्धिक सम्पत्ति, रक्षा र अन्य प्रविधिमा सम्झौता तथा समझदारी पत्रमा हस्ताक्षर गरेका छन् ।

मोहम्मद दक्षिण कोरियाको राजकीय भ्रमण गर्ने यूएईको पहिलो राष्ट्रपति हुन् । उनी दुई दिने राजकीय भ्रमणका लागि मङ्गलबार सियोल आइपुगेका थिए ।