काठमाडौं । कानुनमन्त्री पदम गिरीले सहकारी ठगी सम्बन्धमा गठन गर्ने भनिएको संसदीय छानबिन समितिको कार्यादेश टीओआरमा सहमतिनजिक पुगेका बताएका छन् ।

शुक्रवार बसेको कार्यदल बैठकपछि बोल्दै कानुनमन्त्री गिरीले यस्तो बताएका हुन् । शुक्रबार दिनभरि सहमतिमा पुग्ने कार्यदलका संयोजकसमेत रहेका गिरीले बताए ।

मन्त्री गिरीले सहमतिको धेरै नजिक पुगेको बताए । आजै ४ बजे बालुवाटारमा शीर्ष नेतासहित छलफल गरिने कानुनमन्त्री गिरीले बताए ।

कानुनमन्त्री गिरीले भने, ‘सहमतिको धेरै नजिक पुगेका छौं, दिनभरीमा समस्या समाधानको स्थानमा पुग्छौं । उपप्रधानमन्त्री लामिछानेको नामलाई लक्षित गरेर भन्दापनि संसददेखि संचार माध्यममा उठेका विषयको समाधान गर्नेगरी समिति बनाउने पक्षमा हामी छौ । प्रतिपक्षी दलका साथीहरू पनि संसदमा उठाउँदै आएको स्पिरिट नमर्नेगरी समिति बनाउन सकारात्मक हुनुहुन्छ ।’

संसद् भवनमै पुनः छलफल गरेर अपरान्ह ४ बजे बालुवाटारमा फेरि छलफल हुने उनले बताए । कांग्रेसले भने सहकारी ठगीमा गृहमन्त्री लामिछानेको नाम उल्लेख गर्नुपर्ने अडानमा छ ।