राजविराज । सप्तरीको राजविराजमा एक वृद्धाको हत्या भएको छ । लुडो खेलिरहेका युवाहरुसँगको विवादपछि भएको राजविराज नगरपालिका-१ की ७५ वर्षीया सकिना मियाइनीको कुटपिटबाट हत्या भएको हो ।

कुटपिटबाट हत्या भएको भन्दै मृतककी बुहारी ५२ वर्षीया नजमुन खातुनले जिल्ला प्रहरी कार्यालयमा बिहीबार उजुरी दिएकी छन् । छिमेकीहरू ५४ वर्षीय तफेजुल महम्मदलगायत १० जनाले कुटपिट गरी हत्या गरेको भन्दै नजमुनले बिहीबार उजुरी दिएको प्रहरीले जनाएको छ ।

मियाइनीको उपचारका क्रममा गजेन्द्रनारायण सिंह अस्पताल राजविराजमा सोमबार मृत्यु भएपछि सोही अस्पतालमा मंगलबार पोष्टमार्टम भएको अस्पतालले जनाएको छ ।

राजविराज नगरपालिका-१ स्थित सडकको पूर्व बाँसको चचरीमा बसेर लुडो खेलिरहेका युवाहरुबीचको झगडालाई मियाइनीले रोक्न खोज्दा आरोपितहरूले उनलाई समेत निर्घात कुटपिट गरेका थिए ।