भोजपुर । पेस्तोल देखाएर लुटपाट गरेको आरोपमा प्रहरीले एक जनालाई पक्राउ गरेको छ।

लुटपाट गरेको आरोपमा प्रहरीले टेम्के मैयुङ गाउँपालिका-१ तिम्मा बस्ने ३७ वर्षीय सुमित परियारलाई पक्राउ गरेको हो ।

उनले आइतबार षडानन्द नगरपालिका वडा नम्बर २ बस्ने पासाङ ल्हामु शेर्पालाई जंगलमा पेस्तोल देखाएर सुनका गरगहना तथा नगद लुटपाट गरेको जिल्ला प्रहरी कार्यालय भोजपुरले जनाएको छ ।

प्रहरीको टोलीले षडानन्द ९ स्थित भुल्केटोलस्‍थित जंगलजाने मुलबाटोबाट परियारलाई पक्राउ गरिएको जिल्ला प्रहरी कार्यालय भोजपुरले जनाएको छ । उनीमाथि सोधपुछ तथा उनको झोला खोलेर हेर्दा पेस्तोल र शेर्पाका गरगहना फेला परेको थियो।

उनीबाट एउटा पेस्तोल, एउटा म्याग्जिन, ७ वटा गोली, सेतो प्लाष्टिकमा बेरिएको चार वटा गोली, ९ हजार रुपैयाँ बरामद भएको छ।

यसअघि २०७६ फागुन २१ गते संगठित अपराध, आपराधिक उपद्रव, एनसेलको टावर आगजनी, जेसिबी आगजनी, राज्यविरूद्धको कसुर लगायत पाँच वटा मुद्दामा उनलाई ३ वर्ष ३ महिना कैद सजाय तोकिएको थियो।

उनी उक्त सजाय भुक्तान गरी २०८० भदौमा कारागारबाट छुटेका हुन्।