काठमाडौं । श्रम, रोजगार तथा सामाजिक सुरक्षा मन्त्रालयले रसिया र युक्रेनमा वैदेशिक रोजगारीका लागि जान चाहने नेपालीलाई श्रम स्वीकृति दिन स्थगित गरेको छ ।

शुक्रबार मन्त्रालयले एक प्रेस विज्ञप्ति जारी गरी रसिया र युक्रेनको श्रम स्वीकृति स्थगन गरिएको जानकारी दिएको हो ।

कामदारहरूका लागि श्रम स्वीकृति प्रदान गर्दा युद्धरत देशहरूका सेनामा सहभागी हुनसक्ने सम्भावना रहेको र सोबाट सृजना हुन सक्ने मानवीय जोखिम समेतलाई दृष्टिगत गर्दै अर्को व्यवस्था नभएसम्म पुनः श्रम स्वीकृति, व्यक्तिगत तथा संस्थागत श्रम स्वीकृति दिने कार्य स्थगन गरिएको मन्त्रालयले शुक्रवार जारी गरेको विज्ञप्तिमा उल्लेख छ ।

यसअघि फागुनमा सचिवस्तरिय निर्णय गरेर ती देशका लागि श्रम स्वीकृति खोलिएको थियो। त्यसअघि पुसमा श्रम स्वीकृति बन्द गरिएको थियो ।