विराटनगर । प्रधानमन्त्री पुष्पकमल दाहाल ‘प्रचण्ड’ले नयाँ समीकरण फुटाउन नेपाली कांग्रेसले गृहमन्त्री रवि लामिछानेमाथि छानबिनको कुरा उठाएको आरोप लगाएका छन् ।

आज विराटनगर पुगेका प्रधानमन्त्री प्रचण्डले यस्तो बताएका हुन् । उनले समीकरण फुटाउन कांग्रेसले लामिछानेमाथि छानबिनको कुरा उठाएको आरोप लगाए ।

नयाँ समीकरण बन्नुभन्दा अगाडिदेखि नै सहकारीको विषय उठे पनि अहिले आएर मात्रै कांग्रेसले कुरा उचालेको प्रधानमन्त्री प्रचण्डको भनाई छ ।  प्रधानमन्त्री प्रचण्डले भने,’पहिला कांग्रेससँग गठबन्धन हुँदा नै यो कुरा आएको थियो ।

नयाँ समीकरण फेरिएपछि कांग्रेसले पहिलो कोसिस रविलाई प्रधानमन्त्री बनाउन गरेको हो । त्यो सफल नभएपछि अहिले छानबिनको प्रश्न उठायो ।’

नेपाल प्रहरीको केन्द्रीय अनुसन्धान विभागले रविविरुद्ध कुनै प्रमाण नभएको बताइरहेको उनले दोहोर्‍याए । यसअघि संसद्मा पनि उनले रवि निर्दोष रहेको दाबी गरेका थिए । समग्र सहकारीको र रविको विषयमा अलग गरेर छलफल गरे समस्या समाधान हुन सक्ने उनको भनाइ छ ।

संसद्को गतिरोध अन्त्य गर्न छलफल भइरहेको प्रचण्डले बताए । कांग्रेसले सहकारी प्रकरणमा मुछिएका गृहमन्त्री लामिछानेमाथि संसदीय छानबिनको माग गर्दै आएको छ ।