काठमाडौं । नेपाल भारतमा जारी एसएमएस फ्रेन्डसिप टी-२० कपमा बरोडासँग ३७ रनले पराजित भएको छ ।

१५७ रनको लक्ष्य पछ्याएको नेपाल १८.५ ओभरमा ११९ रनमा अल आउट भएको हो । टस जिती पहिले ब्याटिङको निणर्य लिएको बरोडाले निर्धारित २० ओभरमा आठ विकेट गुमाएर एक सय ५६ रन बनाएको थियो ।

नेपालका सन्दीप जोराले ४३ बलमा ३ चौका र ४ छक्कासहित सर्वाधिक ५६, कुशल भुर्तेल १६, विवेक यादव १७, कुशल मल्ल ३, करण केसी शून्य, दीपेन्द्रसिंह ऐरी २, अनिलकुमार शाह र गुलशन झा १-१ रनमा आउट भए ।

बरोडाका ध्रुव पटेलले ३.५ ओभरमा १६ रन खर्चेर ४ विकेट लिए । लक्षित तोक्सियाले ३, जय अभले २ विकेट लिए । नेपालका करण केसी र गुलशन झाले २-२ विकेट लिए ।

आकाश चन्द, प्रतिश जि.सी र ललित राजवंशीले १-१ विकेट लिए । यसअघि नेपालले गुजरातलाई ८ विकेट र ८ रन तथा बरोडालाई २७ रनले हराएको थियो । नेपालले फाइनलमा आइतबार गुजरातसँग खेल्नेछ ।