पर्वत । पर्वतको जलजला गाउँपालिका–२ मल्लाजमा दम्पती मृत भेटिएको घटनाको अनुसन्धान गर्न प्रदेश प्रहरी कार्यालय पोखराबाट तालिम प्राप्त कुकुरसहितको विशेषज्ञ टोली घटनास्थलमा आइपुगेको छ।

स्थानीय ६९ वर्षीय सूर्यबहादुर जिसी र अन्दाजी ६७ वर्षीया श्रीमती कमला जिसी मंगलबार घरमै मृत अवस्थामा भेटिएका थिए।

उनीहरूको हत्या भएको प्रारम्भिक अनुमानपछि प्रदेशबाट विज्ञ टोली बोलाइएको पर्वतका प्रहरी नायब उपरीक्षक खुमलाल भुसालले जानकारी दिए। जिसी दम्पतीको सोमबार राति हत्या भएको हुनसक्ने प्रहरीको भनाइ छ।

‘गण्डकी प्रदेश प्रहरी कार्यालयबाट डाक्टर र कुकुरसहितको विज्ञ टोली घटनास्थलमा आइपुगेको हो,’ प्रहरी नायब उपरीक्षक भुसालले भने, ‘घटनास्थल प्रहरीको नियन्त्रणमा छ।’

घटना रहस्यमय देखिएकाले अनुसन्धान गर्न विशेषज्ञको टोली बोलाइएको उनले बताए। मृतक जिसी दम्पतीका दुई छोरा वैदेशिक रोजगारीको क्रममा कोरियामा छन्।

एक छोरा म्याग्दीको बेनीबजारमा बस्छन्। त्यहाँ पसल गरेर बस्ने जेठो छोरा रवीन जिसीले घरमा बुबाआमालाई फोन गर्दा नउठेपछि छिमेकीलाई बुझ्न लगाएका थिए। छिमेकीले घरको ढोकामा चाबी लगाएको सुनाएपछि रवीन बेनीबाट गाउँ पुगेका थिए। उनले घरको ढोका खोल्दा बुबाआमा मृत अवस्थामा भेटिएका थिए।

जलजला गाउँपालिका–२ का वडाध्यक्ष प्रकाश जिसीले घरमा जिसी दम्पती मात्र बस्ने गरेको बताए। ‘सोमबार बेलुका साढे ८ बजेको समयमा सूर्यबहादुरले मलाई फोन गरेर घर नजिकको पाखोमा डढेलो लागेको जानकारी दिनुभएको थियो,’ उनले भने, ‘पाखोमा लागेको डढेलो निभाउँदै हुनुहुँदो रहेछ। मैले डढेलो निभाउन अरू मानिस चाहिन्छ भनेर सोध्दा, पर्दैन निभ्न लागेको छ भन्नुभएको थियो।’

हरेक दिन बिहान आमासँग कुराकानी हुने भए पनि मंगलबार बिहान आमाको फोन नआएपछि आफूले फोन गरेको र नउठेको छोरा रवीनले बताए । फोन नउठेपछि म्याग्दीमै बस्ने माइली बुहारीसहित रवीन घर पुग्दा आमाबुवा दुवैजना विभत्स अवस्थामा मृत भेटिएका थिए। रासस