पोखरा । प्राकृतिक स्रोत र सम्पदाले भरिपूर्ण नेपालमा पर्यटन प्रवर्द्धन र वैदेशिक लगानीको सम्भाव्यता अध्ययनका हङकङबाट आएको टोली पर्यटकीय राजधानी पोखरामा आईपुगेको छ ।

चैत १६ गते विश्वव्यापी गैरआवासीय नेपाली संघ (जीएनआरएनए) हङकङका उपाध्यक्ष एवं युवा व्यवसायी आकाश बञ्जाराको नेतृत्वमा एक प्रतिनिधिमण्डल नेपाल आएको थियो ।

‘परिवर्तनको शुरुवात’ भन्ने मुल नाराका साथ उक्त प्रतिनिधिमण्डललाई लिएर बञ्जारा आज नेपाल आएका हुन् ।

नेपाल सरकारले पोखरालाई पर्यटकीय राजधानी घोषणा गरे लगत्तै जीएनआरएनएले हङकङको व्यापारिक समूहलाई वैदेशिक लगानीको सम्भाव्यता अध्ययनका लागि नेपाल ल्याएको हो ।

नेपालमा हङकङ र चिनियाँ लगानीकर्ताहरुले साना व्यापार व्यवसायदेखि ठूला हाइड्रोमा समेत लगानी गर्दै आएका छन् ।

प्रधानमन्त्री पुष्पकमल दाहाल ‘प्रचण्ड’ले चैत ४ गते आइतबार पोखरा महोत्सवको अवसरमा पोखरालाई नेपालको पर्यटन राजधानी घोषणा गरेका थिए । पोखरा प्राकृतिक, साँस्कृतिक साहसिक क्षेत्रको अद्वितीय संगम रहेको भन्दै प्रधानमन्त्रीले नेपालको पर्यटन राजधानी घोषणा गरेका हुन् ।

बञ्जारा सहितको प्रतिनिधिलाई जीएनआरएनए हङकङका संस्थापक एवं सफल युवा व्यवसायी त्रिलोक गुरुङ, जीएनआरएनएका अध्यक्ष पूर्णबहादुर राना र महासचिव सागर थापाले विदाइ गरेका थिए ।

नेपालमा पर्यटन प्रवर्द्धन र वैदेशिक लगानीको सम्भाव्यता अध्ययनका लागि प्रस्थान गर्न लागेको टोलीलाई विदाई गर्दै गुरुङ, राना र थापाले सफलताको शुभकामना प्रदान गरेका थिए ।

सम्भाव्यता अध्ययनका लागि आएको हङकङको उक्त टोलीले कुन–कुन क्षेत्रमा लगानी गर्न सकिन्छ भनेर अध्ययन गर्ने र उक्त लगानी भित्र्याउन जीएनआरएनए हङकङले सहयोग गर्ने उपाध्यक्ष बञ्जाराले बताए ।