काठमाडाैं । सरकारले आइसोलेशन र क्वरेण्टीनमा बस्दा स्वास्थ्य मापदण्डको अनुशासन पालना गर्न आग्रह गरेको छ । स्वास्थ्य तथा जनसंख्या मन्त्रालयले आफ्नो स्वास्थ्यका लागि भए पनि नियमको पालना गर्न आग्रह गर्दै जे–जस्तो सेवा सुविधा पाइन्छ त्यसमा चित्त बुझाउन आग्रह गरेकाे हाे ।

मन्त्रालयका प्रवक्ता डाक्टर जागेश्वर गौतमले आइसोलेशन र क्वरेण्टीनमा रहेकाहरुलाई सहयोगका लागि अपिल गरे पनि उच्च वर्गले नै हिचकिचाहट गरेका बताए । यस्तो अवस्थामा सरकारसँग उपलब्ध स्रोत र साधनको प्रयोग गरी सेवा दिइरहेकाले सबै जना अनुशासित हुन उनले आग्रह गरेका छन् ।

उनले भने, ‘आइसोलेशनमा आफूले खोजे/रोजे जस्तो खाना पाइँदैन । जे–जस्तो पाइन्छ सकारात्मक तरिकाले उपभोग गरौँ ।’ यस्तै उनले स्वस्थ र सफा खाना दिउँ भन्ने चाहना भएकाले त्यसतर्फ चाहिँ प्रयासरत रहेको बताए ।