काठमाडौं । जिल्ला समन्वय समिति काभ्रेका संयोजक दीपक गौतमले अनशन तोडेका छन् ।

सडक कार्यालय र ठेकेदारसँग पाँच बुँदे सहमति भएपछि गौतमले अनशन तोडेका हुन् । उनले धुलिखेल खावा सडक निर्माण तत्काल सुरु गर्न माग गर्दै शुक्रबार अनसन सुरु गरेका थिए ।

सडक डिभिजन कार्यालय भक्तपुर र ठेकेदार गौरी पार्वती निर्माण सेवाले १५ फागुनसम्म कम्तीमा १०० जना जनशक्ति, ४ वटा एक्साभेटर, ६ वटा टिपर, अन्य आवश्यक जनशक्ति, मेसिन र निर्माण सामग्री साइटमा परिचालन गरी निर्माण कार्यलाई तीब्र बनाउन सहमत भएका छन् ।

अबको ३ दिनभित्र निर्माण कार्यलाई द्रुत गति नदिए सडक डिभिजन कार्यालयले ठेक्का तोड्ने प्रक्रिया अघि बढाउने र तयसमा ठेकेदार कम्पनीले उजुरी गर्न नपाउने लगायतका सहमति भएको छन् ।